Во рамките на Универзитетот за аудиовизуелни уметности од септември 2010 година ќе започне да функционира студиската програма за современ танц Skopje Dance Academy. Програмата ќе ја води професор доцент Рисима Рисимкин, а ќе се одвива во соработка со престижната Rotterdam Dance Academy од Холандија. Наставниот план ќе се одвива според програмите на РДА, со визитинг професори од Холандија. Ќе се отвораат можности за соработка помеќу двете академии на повеќе нивоа, како размена на студенти, учество на аудиции во Холандија и работа со холандски кореографи.

Во организација на Универзитетот за аудиовизуелни уметности и Градската Библиотека "Борка Талески" на 27.04.2009 во просториите на Библиотеката во Прилеп, со почеток во 18.00 часот, ќе се одржи настан по повод одбележувањето на 200 годишнината од раѓањето на Шопен. Во рамките на настанот ќе биде презентиран Универзитетот ЕСРА, ќе бидат изведени музички дела од Шопен, ќе се отвори изложба на фотографии од животот на Шопен и ќе биде прикажан филмот "Имагинарно пријателство во градот на Кафка" од Константин Плевнеш.

Ректорот на Универзитетот за аудиовизуелни уметности ЕСРА Пaриз-Скопје-Њујорк, Г-динот Jордан Плевнеш, во периодот од 18 до 30 март ќе одржи серија предавања на француските Универзитети Сорбона во Париз, Универзитетот во францускиот град Мо и Универзитетот во Каркасон на тема: “Местото на Македонија во трезорите на европската култура”. На предавањата ќе биде промовирана и првата книга од едицијата “Suma Plevnesiana” објавена на македонски, француски и англиски јазик, чиј што автор е претседателот на МАНУ, Г-динот Старделов. Во исто време Плевнеш ќе потпишува примероци од неговиот роман “Осмото светско чудо”, во издание на престижната куќа Table Ronde Gallimard.

Академик Матеја Матевски, поет со светско реноме, носител на највисоки национални и меѓународни признанија на 12ти март, со почеток во 11.00 часот ќе биде гостин на Универзитетот за аудиовизуелни уметности ЕСРА Париз-Скопје-Њујорк. Неговиот импозантен поетски, препејувачки и есеистички опус ќе биде тема на проучување на студентите од сите факултети при Универзитетот. Потоа за антологијата на аудиовизуелната меморија на Македонија што ја подготвува Универзитетот ќе ги сними двете антологиски песни од неговиот опус “Кога одевме во Стамбол” и песната “Неверна жена” од Федерико Гарсија Лорка во негов препев. Антологијата на аудиовизуелната меморија ќе продолжи со истакнати имиња од културното и научното творештво.

На 5-ти март, со почеток во 11 часот, во организација на Универзитетот за аудиовизуелни уметности ЕСРА, ќе се одржи советување на тема “Дигитализација на културното наследство и аудиовизуелната меморија во Република Македонија”. Воедно ќе се промовира и новата катедра за Аудивизуелна заштита и архивистика која ќе биде прва и единствена од ваков вид во Македонија, како и книгата “Ризница на македонската колективна меморија” на познатиот телевизиски документарист М-р Мишо Нетков.

По повод одбележувањето на 40 годишнината од постоењето на Меѓународната организација на франкофонијата, Универзитетот за аудиовизуелни уметности ESRA, во соработка со Францускиот културен центар на 5 март 2010 (петок), со почеток во 19 часот, во Кинотеката на Македонија ќе ја организира официјална прослава, која што воедно ќе значи и претставување на "Месецот на франкофонијата во Македонија"

За време на прославата свои обраќања ќе имаат Г-динот Ѓорге Иванов, Претседател на Република Македонија, Г-динот Жан-Клод Шлумберже, Амбасадор на Франција и Г-динот Јордан Плевнеш, Ректор на Универзитетот ЕСРА.