Осмото издание на Интернационалниот театарски фестивал “Актерот на Европа”, кој оваа година имаше исклучително богати содржини, полека но сигурно се трансформира во театарска манифестација која зближувајќи ги трите земји и трите јазици на Преспанкото езеро поделено меѓу Грција, Албанија и Македонија, ја претвори митската убавина на Преспа во сценски простор во кој што беа остварени врвни уметнички презентации на 11 претстави, кои што се вистински мостови на зближувањата на театарските традиции на Балканот со Европа и целиот свет.

Синоќа Претседателот на интернационлното жири, кој воедно е и Потпретседател на агенцијата НЕТА за соработка меѓу театрите на Југо-Источна Европа и поранешен Министер за култура на Република Макеоднија, Г-динот Благој Стефановски, пред многубројната пубика ги соопшти наградите кои беа донесени со едногласна одлука на жирито и кои беа поздравени со големи овации на публиката.

Наградата за најдобар актер ја понесе Ментор Зиберај од Косово за изведбата на претставата “Актер во кутија”, која е негово комплетно авторско остварување, додека наградата за најдобра актерка ја понесе Ирина Евдокимова од Русија за изведбата на претставата “Тажна ноќ”, која што претставува музичко-поетски перформанс, базиран врз опусот на Иван Бунин и Сергеј Рахмањинов, во изведбата покрај Ирина Евдокимова учествуваше и Димитри Малтсев како пијано придружба.

Наградата за најдобра театарска претстава и припадна на претсавата КАСАНДРА, која што е меѓународна копродукција на Фестивалот Експонто (Љубљана), Фестивалот Теута (Котор), Фестивалот МОТ (Скопје), Фестивалот ИНФАНТ и СНП (Нови Сад), по текст на Љубо Ѓурковиќ и во  режија на Слобо Милатовиќ.

Награда за животно остварување му беше доделена на легендата на албанскиот театар Димитри Орготска кој што ја изведе претставата “Самоубиство на цвеќиња”.

Оваа година за прв пат беше воведена и специјална награда “Жак Лакариер” на Универзитетот за аудиовизуелни уметности ЕСРА за посебно остварување во доменот на аудиовизуелната изведба, која и беше доделена на претставата од Арас, Франција “Те сакам Васлав Нижински”.

Организатори на фестивалот беа Здружението на граѓани “Езеро без граници”, Општина Ресен и Универзитетот за аудиовизуелни уметности ЕСРА. Фестивалот се одржа благодарение на несебичната помош на генералниот спонзор Аквапура хотелс, вилас анд спа од Португалија, како и домашните помагатели Тиквеш, Графопром, Рено, Витаминка, Стрежево, Здружението на граѓани Светски релации и весникот Јавност.