Од 06.07 до 11.07.2010 во Сарајот во Ресен ќе се одржи 8-миот интернационален театарски фестивал “Актерот на Европа”. Во рамките на фестивалот ќе бидат прикажани 11 претстави од Македонија, Албанија, Грција, Србија, Франција, Бугарија, Русија и Косово. Свечено отворање ќе биде со традиционална музика од регионот и претставата во интернационална ко-продукција “Касандра”. Организатори на фестивалот се Здружението "Езеро без граници", Универзитетот за аудиовизуелни уметности и Општина Ресен.

Во Сабота, 26.06.2010 во Кумановскиот театар ќе се случи премиерата на претставата “Душички. Седум приказни за љубовта и инвестициите”. Текстот и режијата се на М-р Загорка Поп-Антоска Андовска. Играат Весна Гаврил, Едмонд Сотир, Александра Пешевска, Горан Илиќ, Драгиша Димитријевски – Шипе. Авторска музика и сценографија подготви Александар Андовски, костимографија Фросина Настевска, кореографија Александра Пешевска. Првата реприза е на 29.06.2010 Вторник.

Универзитетот за аудиовизуелни уметности Ве поканува на својата годишна свеченост која што ќе се одржи во петок, на 25 Јуни, со почеток од 20 часот, во Кинотеката на Македонија. Во рамките на свеченоста ќе им бидат доделени признанијата “Златен Дедал” за високи достигнувања во областа на аудиовизуелните уметности на Мери Бошкова, Иван Ивановски, Дарко Марковиќ, Зафир Хаџиманов и Есма Реџепова. По свеченоста Ве покануваме да присуствувате и на нашата Коктел забава.

На 2 Јуни во Софија, Р. Бугарија, во рамките на петнаесетото издание на Меѓународниот Фестивал на Европски Копродукции ќе биде прикажан филмот "Тајната книга" во режија на Владо Цветановски, а по сценарио на Љубе Цветановски и Јордан Плевнеш. Протагонисти во филмот се Жан Клод Кариер, Тиери Фремон и Лабина Митевска. За филмот "Тајната книга" критичарот Фиакра Гибонс на лондонски Guardian ја имаше следната констатација: “Македонскиот филм Тајната Книга е нашата длабока европска приказна и тој високо се издигнува над Кодот на Да Винчи со својата уметничка моќ”.

На 1 Јуни (Вторник) во просториите на Универзитетот за аудиовизуелни уметности, со почеток во 11 часот, во организација на Media Solutions и на системот за дигитален маркетинг “Keep an Eye”, ќе се одржи манифестацијата "Избор на Веб Сајт на Годината". Целта на оваа манифестација е да допринесе во развојот на интернет сајтовите и воопшто на интернетот во Македонија. Со доделувањето на овие признанија на луѓето и компаниите кои се посветиле и инвестирале во изработка на Веб сајтови и солуции за разни примени и кои со својата активност успеале од нив да направат неизбежни чинители во секојдневието на се поголем број Македонци, сметаме дека ќе допринесеме во понатамошниот прогрес и имплементација на интернетот во Македонија.

Универзитетот за аудиовизуелни уметности од Скопје, ќе го прогласи за Doctor Honoris Causa, едно од најголемите имиња на филмската и театарската режија од Југо-Источна Европа, Боро Драшковиќ (роден на 29.05.1935 во Сараево). Митската фигура на модерната филмска и театарска режија која ги одбележа капиталните естетички хоризонти на театарот и филмот на Балканскиот полуостров во втората половина на 20 век, на овој начин ќе биде вклучена во плејадата на имиња што Универзитетот за аудиовизуелни уметности досега ги прогласи за Doctor Honoris Causa како што се Маноел де Оливеира од Португалија, Клод Лелуш од Франција, Јиржи Менцел од Чешка и Шарл Азнавур. Ректорот на Универзитетот за аудиовизуелни уметности, Г-динот Јордан Плевнеш ќе ја чита беседата по повод одлуката на наставно-научниот совет на Универзитетот да му биде доделено ова највисоко признание за исклучителното уметничко дело на Боро Драшковиќ. Истата вечер во присуство на авторот ќе биде прикажан филмот “Кујна” кој што имаше извонредно интернационално ехо на овој голем дух на европската уметност. Настанот ќе се одржи на 31 Мај (понеделник) со почеток во 20 часот во просториите на Кинотеката на Македонија.